2016年7月29日代禱網

平安！請咱同心來祈禱。超越人類為阮世間人開創進入天國的主耶穌基督，感謝祢為阮開路，互阮佇這個短暫的人生、虛空的人生來尋到永遠活命的路。這攏是祢的恩典、也是阮的褔份。主啊！ 求祢奮興阮的敎會，互阮每日攏有靈修、祈禱以及團契的生活，藉著這款的生活，互阮會擋結連佇主、靈命得到長進。此時阮要來為松年團契祈禱；首先欲來感謝主，為阮設立一個松年團契，互阮這些年歲卡多的人呣若有詩歌的練唱、用詩歌來謳咾主，而且閣有孟勳傳道師為阮分享詩篇，互阮會擋藉著這個詩篇來學習正確的祈禱，尚且也會擋互上帝的話來得到造就。求主親自帶領阮松年團契，互阮松年團契的會員，會擋成做一個有溫暖有相愛、有快樂、有活命、信心、順服、關心敎會的一個團契。求主幫助阮會擋做一棵的好樹、結出好的果子，互阮所有松年團契的成員，攏會擋成做敎會的原動力。佇此也欲懇求主繼續來醫治姚添丁兄弟、楊海兄弟以及吳延長老、玲兒長老、秀枝姐、綉花姐，互伊早一日來恢復勇健，通過著正常家庭的生活、敎會的生活。求主聽阮的祈禱奉靠主耶穌基督的名、阿們！(李吉川)